لاہور (آئی این پی) پاکستان کی جانب سے بھارت کی آبی جارحیت کا منہ توڑ جواب دیتے ہوئے پاکستان میں جاری پی ایس ایل کے نشریاتی ادارے سے وابستہ بھارتی ملازمین کو پاکستان سے نکال دیا گیا۔
تفصیلات کے مطابق پی ایس ایل 10 کے نشریاتی ادارے سے وابستہ 23 بھارتی شہریوں کو واہگہ بارڈر کے راستے بھارت بھیج دیا گیا۔ لاہور پولیس نے براڈکاسٹر کے ارکان کو روایتی راستے واہگہ بارڈر کے ذریعے بھارت روانہ کیا۔ حکومت نے بھارتی شہریوں کو فوری طور پر پاکستان چھوڑنے کا حکم دے دیا۔
انسٹاگرام پر ایک پوسٹ شیئر کی گئی جس میں پاکستانی حکومت نے پاکستان سپر لیگ 10 کی نشریاتی ٹیم سے وابستہ تمام ہندوستانی شہریوں کو 48 گھنٹوں کے اندر ملک چھوڑنے کا حکم دیا۔ حکومتی فیصلے سے دو درجن سے زائد بھارتی ملازمین متاثر ہوئے، جن میں انجینئرز، کیمرہ آپریٹرز، پروڈکشن ایگزیکٹوز اور پلیئر ٹریکنگ ماہرین شامل تھے، جو پی ایس ایل 2025 کی براہ راست نشریات میں شامل تھے۔
پاکستان کرکٹ بورڈ (پی سی بی) اور براڈکاسٹر ٹرانس ایشیا میچوں کے تسلسل کو یقینی بنانے اور نشریات میں خلل سے بچنے کے لیے متبادل عملے کی تلاش میں ہیں۔
