لاہور (ڈیلی پاکستان آن لائن) پاکستان سپر لیگ (پی ایس ایل) کے گروپ مرحلے کے میچ میں لاہور قلندرز نے ملتان سلطانز کو پانچ وکٹوں سے شکست دے دی۔ ملتان کی جانب سے دیا گیا 186 رنز کا ہدف لاہور کی ٹیم نے 19 اوورز میں پانچ وکٹوں کے نقصان پر حاصل کر لیا۔
ملتان سلطانز کے 186 رنز کے ہدف کے تعاقب میں لاہور قلندرز کی پہلی وکٹ 12 رنز کے مجموعی سکور پر گر گئی۔ اوپنر محمد نعیم صرف چھ رنز بنانے کے بعد پویلین لوٹ گئے۔ دوسرے اوپنر فخر زمان نے 28 رنز بنائے۔ لاہور قلندرز کی جانب سے عبداللہ شفیق 34 اور سیم بلنگز کوئی رن بنانے میں ناکام رہے۔
لاہور کے ڈیرل مچل نے انتہائی جارحانہ بلے بازی کا مظاہرہ کیا اور 38 گیندوں پر چار چھکوں اور چار چوکوں کی مدد سے 64 رنز بنائے جبکہ سکندر رضا 40 رنز بنا کر آؤٹ ہوئے۔
ملتان سلطانز کی جانب سے عبید شاہ نے دو وکٹیں حاصل کیں۔ عاکف جاوید، محمد حسنین اور جوشوا لٹل نے ایک ایک کھلاڑی کو آؤٹ کیا۔
اس سے قبل ملتان سلطانز نے پہلے بیٹنگ کرتے ہوئے مقررہ 20 اوورز میں تین وکٹوں کے نقصان پر 185 رنز بنائے۔ لاہور قلندرز کی جانب سے بیٹنگ کی دعوت ملنے کے بعد ملتان سلطانز نے محتاط رویہ اپنایا۔ 70 کے مجموعی سکور پر تین وکٹیں گرنے پر کپتان محمد رضوان اور کامران غلام نے شاندار بلے بازی کا کھیل پیش کیا اور آخری گیند تک مقابلہ کرتے رہے۔ محمد رضوان نے 76 رنز بنائے جبکہ کامران غلام 52 رنز کے ساتھ ناٹ آؤٹ رہے۔ لاہور کی جانب سے ٹام کرن، حارث رؤف اور ڈیرل مچل نے ایک ایک وکٹ حاصل کی۔
قذافی اسٹیڈیم میں کھیلا جانے والا یہ میچ پی ایس ایل کے تازہ ترین ایڈیشن کا 16واں میچ تھا۔
