میران شاہ: اتوار کے روز شمالی وزیرستان میں پاک افغان سرحد کے قریب فائرنگ کے تبادلے کے دوران مبینہ طور پر افغان جانب سے فائر کیا گیا مارٹر گولہ رہائشی علاقے میں گرنے سے ایک بچہ جاں بحق اور چار افراد زخمی ہو گئے۔
پولیس ذرائع کے مطابق واقعہ شام ساڑھے سات بجے کے قریب اس وقت پیش آیا جب غلام خان کے علاقے میں سرحد کے دونوں اطراف سے شدید فائرنگ شروع ہو گئی۔
انہوں نے مزید کہا کہ فائرنگ کے تبادلے کے دوران سرحد پار سے فائر کیا گیا ایک مارٹر گولہ قریبی گاؤں گولا خیل میں گرا اور ایک رہائشی علاقے میں پھٹ گیا۔
انہوں نے بتایا کہ دھماکے کے نتیجے میں ایک نابالغ کی موقع پر ہی موت ہو گئی جبکہ چار دیگر افراد زخمی ہو گئے۔
مقامی افراد نے زخمیوں کو فوری طور پر میران شاہ کے تحصیل ہیڈ کوارٹر ہسپتال پہنچایا جہاں انہیں طبی امداد فراہم کی جا رہی ہے۔
اسپتال ذرائع کا کہنا ہے کہ زخمیوں میں سے بعض کی حالت تشویشناک ہے جب کہ ڈاکٹرز اور طبی عملہ ہنگامی طور پر علاج میں مصروف ہے۔
واقعے کے بعد شمالی وزیرستان کے ڈپٹی کمشنر یوسف کریم کی ہدایت پر تحصیلدار میران شاہ غنی وزیر اور تحصیلدار غلام خان عزیز وزیر اسپتال کے ایمرجنسی وارڈ میں پہنچ گئے۔
انہوں نے ڈاکٹروں اور ہسپتال کے عملے کو ہدایت کی کہ زخمیوں کو تمام ضروری طبی سہولیات کی فراہمی کو یقینی بنایا جائے۔
حکام نے بتایا کہ ہسپتال کے ایمرجنسی ڈیپارٹمنٹ کو ہائی الرٹ کر دیا گیا ہے اور زخمیوں کا علاج جاری ہے۔
شمالی وزیرستان میں غلام خان بارڈر کراسنگ پاکستان اور افغانستان کے درمیان تجارت اور سفر کے لیے ایک اہم راستہ ہے۔ تاہم سیکیورٹی کی موجودہ صورتحال کی وجہ سے کراسنگ فی الحال مکمل طور پر بند ہے۔