کراچی (نوائے وقت رپورٹ) امیر جماعت اسلامی پاکستان حافظ نعیم الرحمن نے جماعت اسلامی ضلع گلبرگ وسطی کے تحت اسٹوڈنٹ گراؤنڈ بی ون ایریا لیاقت آباد میں منعقدہ جماعت اسلامی کی مجلس عاملہ اور دعوت افطار سے خطاب کرتے ہوئے کہا کہ ایران پر اسرائیلی اور امریکی حملے کھلی دہشت گردی ہیں۔ ایران پر حملہ صرف ایران پر نہیں بلکہ پاکستان کے ایٹمی پروگرام پر بھی مرکوز ہے۔ پوری قوم نے ایران کا ساتھ دیا۔ پاکستانی حکومت کو بھی سخت موقف اختیار کرنا چاہیے اور واضح طور پر ایران کی حمایت کا اعلان کرنا چاہیے۔ جنگ کے شعلوں کو روکنے کے لیے پاکستان کو فوری طور پر اپنا کردار ادا کرنا چاہیے۔ اگر امریکہ نے دہشت گردی پر توجہ دینی ہے تو چین اور روس کو بھی اس میں شامل ہونا ہوگا، افغان حکومت برسراقتدار آئی تو سارے پاکستان نے اس کا خیر مقدم کیا۔ آج بھی عوام کے دل افغانوں کے لیے کھلے ہیں لیکن انہیں اپنی صفوں سے کالی بھیڑوں کو نکالنا ہوگا۔ پاکستانی حکومت کو افغانستان کے ساتھ بامعنی مذاکرات کرنے چاہئیں۔ امریکہ، اسرائیل اور بھارت کو ایک دوسرے سے لڑ کر خوش نہیں ہونا چاہیے۔ افغانستان کو سمجھنا چاہیے کہ بھارت کبھی بھی مسلمانوں کا دوست نہیں ہو سکتا۔ اسی طرح امریکہ اور اسرائیل مسلمانوں کے دوست نہیں ہو سکتے۔