ملتان (ڈیلی پاکستان آن لائن) پاکستان سپر لیگ (پی ایس ایل) کے 10ویں ایڈیشن میں اسلام آباد یونائیٹڈ کی جیت کا سلسلہ جاری ہے، دفاعی چیمپئن نے اپنا پانچواں میچ بھی جیت لیا۔ اس بار انہوں نے ملتان سلطانز کو باآسانی 7 وکٹوں سے شکست دی۔ ملتان کرکٹ سٹیڈیم میں کھیلے گئے میچ میں ملتان سلطانز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں پر 168 رنز بنائے۔
عثمان خان نے 61 رنز، کپتان محمد رضوان نے 36، یاسر خان نے 29، کامران غلام نے 13 اور افتخار احمد نے 10 رنز بنائے۔اسلام آباد یونائیٹڈ کی جانب سے ریلی میرڈیتھ، جیسن ہولڈر، محمد نواز اور شاداب خان نے ایک ایک وکٹ حاصل کی۔ اسلام آباد یونائیٹڈ کی ٹیم نے 18ویں اوور کی پہلی گیند پر صرف تین وکٹیں گنوا کر مطلوبہ ہدف حاصل کر لیا۔ یونائیٹڈ کے اوورسیز کھلاڑی اینڈریس گوس نے 45 گیندوں پر 80 رنز کی ناقابل شکست اننگز کھیلی، کولن منرو نے 45، صاحبزادہ فرحان نے 22 اور محمد نواز نے 21 رنز بنائے۔ملتان سلطانز کی جانب سے مائیکل بریسویل، عبید شاہ اور کرس جارڈن نے ایک ایک وکٹ حاصل کی۔