لاہور+ کراچی (نامہ نگار+ این این آئی) شیر خدا امیر المومنین حضرت علی مرتضیٰ کرم اللہ وجہہ کی 21ویں رمضان المبارک کی مناسبت سے گزشتہ روز یادگاری تقریبات کا انعقاد کیا گیا، لاہور سمیت ملک کے دیگر حصوں میں جلوس نکالے گئے، سیمینارز اور کانفرنسز کا انعقاد کیا گیا اور مساجد و امام بارگاہوں میں خصوصی تقریبات اور مجالس کا انعقاد کیا گیا۔ اس میں رسول اللہ کے داماد حضرت علی کرم اللہ وجہہ کی مبارک زندگی اور فضائل کو دکھایا گیا ہے۔ صوبائی دارالحکومت میں مرکزی جلوس مبارک حویلی موچی دروازہ سے کربلا گیم شاہ تک روانہ ہوا۔ جلوس چوک نواب صاحب، وزیر خان مسجد، سنہری مسجد، رنگ محل، پانی والا تالاب، تحصیل بازار، اونچی مسجد، بھاٹی چوک اور دیگر مقررہ مقامات سے ہوتا ہوا غروب آفتاب کے وقت کربلا گیم شاہ پہنچا۔ دریں اثناء بلاول بھٹو زرداری نے کہا کہ سیدنا حضرت علی مرتضیٰ عدل، حکمت، جرأت اور غیر متزلزل ایمان کی روشن مثال ہیں۔ وزیراعلیٰ سندھ سید مراد علی شاہ نے خراج عقیدت پیش کرتے ہوئے کہا کہ حضرت علیؓ کی تعلیمات انصاف، جرات اور انسانیت کی عظیم مثال اور پوری امت مسلمہ کے لیے مشعل راہ ہیں۔ وزیراعلیٰ سندھ نے دعا کی کہ رب کائنات ہمارے ملک کو امن، استحکام اور خوشحالی عطا فرمائے۔