نیویارک (ویب ڈیسک) امریکا میں تعلیم حاصل کرنے والے پاکستانی نوجوان اور سیریل انٹرپرینیور تیمور حسن نے ایک اور بڑا کارنامہ سرانجام دے دیا۔ انہوں نے اپنے دو ساتھیوں جواد احمد اور محمد اویس کے ساتھ مل کر پاکستان کا اردو چیٹ GPT “قلب” تیار کیا جسے دنیا کا سب سے بڑا اردو زبان کا ماڈل قرار دیا جاتا ہے۔
“قلب” کو تقریباً 1.098 بلین الفاظ پر تربیت دی گئی اور اس نے 7 عالمی معیار کے ٹیسٹوں میں موجودہ اردو AI ماڈلز کو واضح طور پر پیچھے چھوڑ دیا۔ ماہرین کے مطابق یہ ماڈل نہ صرف اردو کو سمجھنے کا ایک بہتر طریقہ فراہم کر رہا ہے بلکہ اوسط صارف کے لیے زیادہ عملی بھی ثابت ہو رہا ہے۔
اس پروجیکٹ کا مقصد دنیا بھر کے 230 ملین سے زیادہ اردو بولنے والوں کو ان کی مادری زبان میں جدید مصنوعی ذہانت فراہم کرنا ہے تاکہ تعلیم، کاروبار، کسٹمر سروس، ڈیجیٹل ایپس اور آواز پر مبنی نظام جیسے شعبوں میں انقلاب برپا کیا جا سکے۔
تیمور حسن اس سے قبل کامیابی کے ساتھ 13 اسٹارٹ اپ لانچ اور بند کر چکے ہیں، مائیکروسافٹ کپ جیت چکے ہیں اور بین الاقوامی سطح پر پاکستان کی نمائندگی کر چکے ہیں۔ انہوں نے فاسٹ یونیورسٹی سے کمپیوٹر سائنس میں بیچلر کی ڈگری حاصل کی ہے اور اس وقت وہ امریکہ میں اعلیٰ تعلیم حاصل کر رہے ہیں، جہاں وہ AI کے جدید منصوبوں پر کام کر رہے ہیں۔
تیمور حسن کا کہنا ہے کہ ٹیکنالوجی اب بڑی کارپوریشنز یا اربوں ڈالر کے بجٹ تک محدود نہیں رہی بلکہ نوجوانوں کا ایک چھوٹا گروپ مل کر ایسے منصوبے بنا سکتا ہے جو لاکھوں لوگوں کی زندگیوں کو بدلنے کی صلاحیت رکھتے ہیں۔
ماہرین کے مطابق ‘قلب’ کی تیاری مصنوعی ذہانت کے شعبے میں پاکستان کے لیے ایک تاریخی سنگ میل کی حیثیت رکھتی ہے اور پاکستان کو عالمی ٹیکنالوجی کے نقشے پر نمایاں کرنے میں اہم کردار ادا کرے گی۔