نیویارک (ڈیلی پاکستان آن لائن) ٹیسلا اور اسپیس ایکس کے سی ای او ایلون مسک نے میٹا کی ملکیت واٹس ایپ کو ڈیٹا سیکیورٹی کے مسائل پر تنقید کا نشانہ بناتے ہوئے اس کی بجائے ایکس چیٹ کو استعمال کرنے کا مطالبہ کیا ہے۔
ایلون مسک کی پوسٹ میٹا کے خلاف دائر مقدمے کے نتیجے میں سامنے آئی ہے، جس میں واٹس ایپ کی پرائیویسی اور سیکیورٹی کے دعووں کو چیلنج کیا گیا ہے۔
ایلون مسک نے لکھا
مسک نے یہ تبصرہ ایک صارف کی ایک پوسٹ کے جواب میں کیا جس میں دعویٰ کیا گیا تھا کہ کمپنی اینڈ ٹو اینڈ انکرپشن کا وعدہ کرنے کے باوجود واٹس ایپ صارفین کی نجی چیٹس پڑھ سکتا ہے۔
بلومبرگ کی رپورٹ کے مطابق مقدمہ دائر کرنے والے مدعیان کا تعلق بھارت، آسٹریلیا، برازیل، میکسیکو اور جنوبی افریقہ سے ہے۔ مدعیوں نے الزام لگایا کہ میٹا اور واٹس ایپ نے صارفین کی نجی بات چیت کو اسٹور، تجزیہ اور ان تک رسائی حاصل کرکے اربوں صارفین کو دھوکہ دیا۔
واٹس ایپ کا کہنا ہے کہ اینڈ ٹو اینڈ انکرپشن کی بدولت پیغامات کو صرف بھیجنے والے اور وصول کنندہ تک ہی محدود رکھا جا سکتا ہے۔ میٹا کے ترجمان اینڈی سٹون نے مقدمے کو “غیر سنجیدہ اور بے بنیاد” قرار دیا اور کہا کہ کمپنی قانونی کارروائی کے ذریعے مدعی کے وکلاء کے خلاف پابندیاں مانگے گی۔
میٹا نے واٹس ایپ کو 2014 میں حاصل کیا، اور اینڈ ٹو اینڈ انکرپشن پچھلی دہائی سے اس کا ایک حصہ ہے۔