لاہور (ڈیلی پاکستان آن لائن) پی ایس ایل 10 کا فائنل آج لاہور قلندرز اور کوئٹہ گلیڈی ایٹرز کے درمیان کھیلا جائے گا۔
نجی ٹی وی چینل جیو نیوز کے مطابق پاکستان سپر لیگ (پی ایس ایل) سیزن 10 کا فائنل آج دو مرتبہ کی چیمپئن لاہور قلندرز اور 2019 کی چیمپئن کوئٹہ گلیڈی ایٹرز کے درمیان کھیلا جائے گا۔
رپورٹس کے مطابق دونوں ٹیموں نے فائنل کے لیے مناسب تیاری نہیں کی تھی اور لاہور میں تیز ہواؤں اور بارش کے باعث گزشتہ روز کا پریکٹس سیشن منسوخ کردیا گیا تھا اور خراب موسم کے باعث ٹرافی تھامے دونوں ٹیموں کے کپتانوں کے ساتھ فوٹو سیشن اسٹیڈیم کے بجائے ایک ہوٹل میں کیا گیا۔
دونوں ٹیمیں رواں سیزن میں دو بار آمنے سامنے ہوئیں، پہلا میچ لاہور قلندرز نے 79 رنز سے جیتا تھا، جب کہ دوسرا میچ بارش کے باعث منسوخ ہو گیا تھا۔
پاکستان سپر لیگ میں دونوں ٹیموں کے درمیان کھیلے گئے کل 19 میچز میں لاہور قلندرز نے 9 اور کوئٹہ گلیڈی ایٹرز نے 9 میں کامیابی حاصل کی تاہم ایک میچ بے نتیجہ رہا۔
نجی ٹی وی کے مطابق ایچ بی ایل پی ایس ایل فائنل کے دوران ہیگن پارک میں ایک تقریب کا انعقاد کیا جائے گا۔
اس سے قبل آرمی اور ایئر فورس کو خراج تحسین پیش کیا گیا تھا۔
پی سی بی حکام کے مطابق فائنل کے بعد وقفے کے دوران قذافی سٹیڈیم میں خصوصی تقریب کا انعقاد کیا جائے گا۔