لاہور (آئی این پی) بھارت نے پاکستان سپر لیگ (پی ایس ایل) کی معروف فرنچائز لاہور قلندرز کے سوشل میڈیا اکاؤنٹس تک رسائی بلاک کر دی۔ پی ایس ایل کی سابق چیمپیئن فرنچائز نے دعویٰ کیا ہے کہ بھارتی حکومت نے لاہور قلندرز کے سوشل میڈیا اکاؤنٹس تک رسائی بلاک کردی ہے۔
لاہور قلندرز کے ترجمان کے مطابق فرنچائز کے فیس بک اور انسٹاگرام پیجز کو بھارتی ناظرین کے لیے بند کر دیا گیا ہے۔ سوشل میڈیا پلیٹ فارم پر ابھی تک وجہ سامنے نہیں آئی۔ ایک پیغام میں کہا گیا ہے کہ آپ کا صفحہ ہندوستان میں دستیاب نہیں ہے۔ پاکستان سپر لیگ (پی ایس ایل) میں شرکت کرنے والی تمام فرنچائزز کے سوشل میڈیا چینلز عالمی سطح پر مقبول ہیں، صرف لاہور قلندرز کے مشترکہ ناظرین کی تعداد 264 ملین سے زیادہ ہے۔
خیال رہے کہ پہلگام واقعے کے بعد اسپورٹس اسٹریمنگ چینل فینکوڈ نے بھارت میں پاکستان سپر لیگ (پی ایس ایل) کی لائیو اسٹریمنگ روک دی تھی اور انتہا پسند مودی حکومت کے خلاف ٹورنامنٹ سے متعلق جھلکیاں اور ویڈیوز ڈیلیٹ کردی تھیں۔